Fjallagrasa hálsmixtúrurnar frá Íslenskum fjallagrösum hf hafa verið framleiddar á Íslandi frá árinu 2004 og líkað mjög vel gegn særindum í hálsi, sem yfirleitt fylgja kvillum í öndunarfærum eins og kvefi og flensu. Fyrirtækið Íslensk fjallagrös hf hefur starfað óslitið frá 1993 og sérhæft sig í að framleiða nútímalegar vörur úr fjallagrösum án þess að upphafleg virkni þeirra minnki. Við þróun mixtúrunnar er byggt á reynslu margra kynslóða af notkun fjallagrasa gegn alls kyns kvillum í hálsi og öndunarfærum. Þegar eru á markaðnum alkólfríar hálsmixtúrur bæði fyrir börn og fullorðna. Nú er bætt við Íslenskum brjóstdropum, sem innihalda m.a. mentól, salmíak og alkóhól. Nýju brjóstdroparnir innihalda áfram mjög hátt hlutfall af fjallagrösum, sem tryggir mikla virkni þeirra eins og í hinum hálsmixtúrunum.
Brjóstdroparnir eru með alkohóli og því ekki handa ungum börnum.
Lækningamáttur
Rannsóknir Hallgerðar Gísladóttur sagnfræðings sýndu að langalgengustu kvillarnir sem grösin áttu að lækna voru í öndunarfærum og meltingarvegi. Það var mjög algengt að sterkt seyði af grösum og kandíssykri var til á bæjum, eins konar hóstasaft – eða brjóstsaft, eins og margir nefndu þennan drykk – til að gefa við kvefi, hæsi eða þyngslum fyrir brjósti. Og stundum var sletta af víni látin út í. Sjálf þekkti hún að hafa verið sem barn látin drekka í veikindum rótsterkt heitt grasaseyði kryddað með brennsluspíritus.
Íslendingar hafa notað fjallagrös (á latínu: Cetraria islandica, á ensku Iceland moss) í mat og til lækninga um aldir, einkum gegn kvillum í hálsi og maga. Fjallagrös innihalda leysanlegar trefjar, Lichenin (70% af þurrvikt) og Isolichenin (10% af þurrvikt) sem mynda mýkjandi himnu á slímhúð í hálsi og maga og draga þannig úr hósta og særindum í hálsi. Þessi áhrif eru vel þekkt og m.a. viðurkennd af heilbrigðisyfirvöldum í Evrópu. Fjallagrös innihalda líka fléttusýrur eins og Protolichesterinic Acid (2-7% af þurrvikt), sem sýnt hefur verið fram á að hefur hemjandi áhrif á bakteríur eins og Helicobacter pylori, sem m.a. getur valdið magasári.
Fjölmargar vísindarannsóknir virtra vísindamanna, hafa sýnt að virku efnin í grösunum eru ónæmisörvandi og geta hindrað vöxt baktería og veira. Niðurstöðurnar styðja því vel við aldagamla trú manna á heilsugildi grasanna og að lækningamáttur þeirra eigi við rök að styðjast.
